Banghang A Awlmoh Ding?

Mi bangzahte'n singnou i suankha himhim ding uam ah. I singnou suante uh a pichin nung in mi bangzahte'n i va veh kha ding uam ah. Singnou khawng i suan a, i theihlouh kaal in a hong piching a, a liim peuh a i va omleh singkung dangte' liim sang a nuamzaw hileh a kilawm a, ei mah suan ahihziak ahiam ah lawptuam in a om mahmah hi. Ahihkaleh ei mah haichi tuh apan neek khawng ana nuamse leh limse a bang hi. Bazar khawng a tangmai i lei a i neek toh huan hiam, lou hiam a ei mahmah tuhsa neek tuh a kibangkei hial hi. Lungsim guuk ah kipahna leh lungkimna khat a om a, hihkha leh lohching kisakna khat a om hi. Ei mahmah khut a i chiin sing leh loute nangawn in tua bang kipahna ahon tutleh, ei khut mahmah a i kep, ei tha mahmah toh i khoilet mihing in kipahna bangzahta ahon tun dia!

Tulel dinmun in zodawn a naupangte panpih ding thil haksa lua ana hi hetkei zaw hi. Khopi a hotel a khatvei i an neek man in naupang khat khakhat-khanih a vaakzou. I puannak khat man in naupang khat kumkhat sung a skul fee a sutuahzou ding hi. Puanak khenkhat ngial in houh naupang nih-le-thum a vaakzou ding. Kum khat a teng sangkhat thoh ding huchipi in haksa khollou ding a, himahleh tua teng sangkhat in zodawn naupang khat tung a a nnasep theih thupi mahmah hi. Huchi hinapi in gintaak sang in i thoh hehu kholkeizaw uhi. Bang in hon suthasial ahia? Bang in hon thadahsak ahia? Bang in hon kithalawpsak zoulou ahia?

Khovel hinkhua tuh ei kia, ei unau kia, ei innkuan kia ahi gigekei. Huchi ana hitaleh banghang a mi tampite'n chikmah a atheih ngeilouhte uh adia gim leh tawl ana thuak ding ua, a hinna natan uh ana pe ding uh ahia? Tuma kum bangzah hiam lai a pawlkhatte'n amau' nopsakna sang a midangte' khanloh ding a awlmoh zawk ziak ua eite'n  huai bang mite' kipiakzohna gahlou a tu a khopi-khota a nuamsatak a khosa i hikei ua hia? Mite'n huai hunlai a amau nopsakna khelah a ei pawl honna buaipih peihlou hile uh tu in koi ah i om ding ua? Ahihleh tu a amaute' kipiakzohna gah lou a, khangkhia a nuamsatak a i khosak tak a en ei liangkou a kinga mohpuakna limsak nuamlou ding i hi ua hia? Tu a a khosaktheihna ama' tha liauliau ziak ahi chia kisathei a, haksazawte panpih ding thasial a omleh theihsiamlouhna in a mit a hihmial a, mawlna in a lungtang a tuamchip ziak ahi ding. Khang tampi a mi tampite' gimna leh tawlnate' ziak liauliau a michih tua i tun tan tung i hi. Kuapeuh, a sangpen  leh a thupipen tan in, hiai ah i awk chiat a, kisiamtan thei ding khat mah leng i omkei.

Tua bang a nnahoih sepna tuh phattuam ngaihna leng ahikei. I sep ding him ahi. I mohpuakna ahi. Seplouh theihlouh thil ahi. I sep nopkei leh mite' tha athawn a nenu-nepa' tung ah tunggikna akhang-akhang in a om ding. Mite'n tua bang a mohpuakna akhang-akhang a paisawn tha-ittak a asep seuhseuhlai ua ana om maimai mite tuh tua mohpuakna apan awlsak a a-om hun chiang un a kipakkei hial ding uhi. A septheih hun ua sem nuamlou khang tuh sem theilou ding a zawngkhalsak a hihchiang un thaman a sakei hial ding uhi.

Huai a tuma hun sawtpilai a chikmah a hon thei ngeilou, imel-ipuam kibatpih le hiloute' sepgah mu a tu a hiai tan i tun nung a tu in eite'n tua mohpuakna sunzomkei le'ng tunung chiang a i khangsawnte uh bangsuak ding uh ahia? Mabaan lam-etnalou in khovel hinkhua bang manphatna a om a? Tua mabaan i limsak nopkei leh bang limsakta ding i hia? I sep theihlouh leh i sep zohlouh phuut a om i hikei a, i septheih chiat, i sepzoh dandan a sem dia phuut i hi. Kua mah kidangkoihkei ni. Dangkoih in om takpi le'ng kua mah i lungkim hetkei ding uh.

Ei' ma a khangte'n a sep ding bang uh aseem uh hiam asemkei uh hiam amau hun abeita a, tu in ei pawl i kipat uh a hunta hi. Kei mahmah in leng hichi bang hun ei chiitchait' liangkou a ahong kingak ding ka ngaihsun pha ngei himhimkei. Huai nna a kidiahkhak ni hong tung ding in leng ka ngaihsun ngeikei. Himahleh tuma May-June 2014 sung a innlam ka va pai a, Sialkal tang khawng a saptuam' skul a sem skulpute' kithuahkhawmna khawng a ka va tel a, Lamka a kai ngeina skulte khawng ka va vehna ah ei tung hong tung peetmahta ahi chih ka va mukhia hi. Tua mun ah skulpu tamzawte kei vual hiam, kei sang a naupangzaw hiam ahi uhi. I mabaan ding ei khutsung ngeekngeek a koih in a om a, i deih dandan a sui thei i hita. Ei ma a khangte' suih bangbang uh mabaan a mu ua, tu in en ei khut sung a om, i sui bangbang mabaan i mu ding hi. Huaiziak in aphual mahmah a bual a, gim leh tawl a pangte leng khanloh a, denchiang a igim-itawlnate a hong thotlouh teiteina ding a chiimtak a ngaihsutna toh i pan uh a kuul mahmah hi. Hiai mabaan bawlna tuh hichia amah leh amah a tuahkhak dandan a mabaan sawn ding a khahzan ding in a paammaih a, phalhuai leng ahikei. Singnou khat amah leh amah in khang leh a ut leh a kawi dia, a ut leh suahlam ah hiang a kha dia, a utleh hiang tampi a nei dia, a ut leh a buk dia, a utleh a heu ding hi. Himahleh tua singkung tuh a neu apan enkol in, ching ngiitngeet le hang  bangtan hiam i deihdan in omsak thei ding hi. I deihdan in i kawisak-tangsak thei dia, suahlam a hiang i deihkei a huailam a hiang  a khiatleh a neulai in baihlam tak in i eukhe thei a, i deihna lam a a khiatte i zuun thei hi. Tua bang in i mabaan bang i deih hiam chih chiimtak a i muh naakleh i khutsung a om i mabaan ding i deih bangbang in bangtan hiam beek i sui in i seek thei ding hi. Tua hilou a etkollouh a nawkkhaak lamlam nawkkha a i paisak le bel i deih hetlouhdan bang in leng i bawlkha thei hi.

Huaiziak in a mun mahmah a bualte hileh, agaal a pan theih bangbang a pangte hitaleng, hiai i nna uh, i liangkou ua kinga, phattuam ngaihna a sep ding hilou, i mohpuak ahihziak a i sep ding i sepna ah kisuuk chiat ni. A ngeingaihlou thei ding kuamah i omkei. Ei mah nopsakna ding leltak sang a nna poimohzaw ahi a, i thadahna sang a poimohzaw thil ahi a, i kisaktheihna sang a poimoh zaw thil ahi. Thadah ziak hiam, kiletsak ziak hiam, kikhothang siamputsak ziak khawng leltak a ngeingaihlouh theih thil ahikei.

Pathian in David kiang a amah David hilou a a tapa in a inn ding lamsak dingahihdan ahilh bang in inn leh lou lam ding awlmoh naikei ni. I tha neih teng in tuate lamkhe ding a mi lamkhe phot ni. En inn leh lou thupitak lam in a kem ding gina omkei leh bang a phatuam dia? Tuate kizen tak a keem ding mi lamkhe phot ni. A huchihkei leh zaw i tha uh i sengthawn phet kha mahmah ding uh.

KFC a aksa i va neek chiang in lim i sa a, i kipak in i lungkim mahmah hi. Khatvei peuhmah i KFC neek taang in zodawn naupang khat panpih sin himhim ni, tua ah bang kipahna a om hiam chepna ding in. KFC neek sang a kipahna buchingzaw leh lungkimna thuukzaw ana omkha maithei ahi. A nei zoulou naupang khat pencil khat keleu hitaleh leng, khatvei leisak himhim mah ni, huai ah bang lungnopna i mu zenzen kha hiam. Neih leh lam a lah huchi lua a mi englou a, lawm leh vual lah nei a, nu leh pa leh u leh nau lah nei a, huchi napi a khovel a lungnopna nei theilou a, kipak theilou a i kitheihleh khatvei mawngmawng hiai naupang panpih ngaite panpih himhim le, i zonzon kipahna leh lungkimna huai ah i mukha mai ding e!

Ateek-akhang kipan ni. Ei mah singliim ding chiat suan kipanta ni. Denchiang in mite amau singliim chiat ah nuamtak in a hong tawldam ding ua, huai hun chiang in tawldam saamna ding singliim neilou in mite en in i daakdaak nuam dia hia? Mite' piakzah leh thohzah i pezou in i thohzoukei kha maithei, ahihkaleh mite’ sang a tampi thohzou i hi maithei. Bangteng hileh ei toh kikhom i panzoh zahzah in thasiallou in pang ni. Tu a i singnou suan denchiang in singkung thupi leh kilawm a hong hikei ding kua'n a chi ngam a? Tua bang a singkung paak kilawm a ahong paak a, liim nuamtak a piak hun chiang in mite'n, 'En dih uh, huai singkung, huai mipa-minu' suan eive,' achi ding uh. Huchia kua hiam in singnou i suan a, a hong let chiang a akipahhuaidan, akithalawp huaidan ngaihsun baanlou a, geel phalou i om leh hiai ka hon gen hi, kei ngei in singnou ka na suan a, tu in lianta in liim leh paak kilawm a peta a, ka suan lai a ka ngaihsut phaak hetlouh kipahna leh lungkimna a hon tun hi.

(Note: Thugelh hoihtak hon pawsuah Pu V. Tunzasiam tung ah kipahna lian mahmah hi. A hoihzaw i gam a ahong pian ngei ding deihna ziak a Teach Zodawn min a suahkhiat ahi.)

~ Chairman, Teach Zodawn Team.

Zodawn siamsin naupangte lak a khenkhat (Khuanggin)