Teach Zodawn Laibu Kikhakte Va Etna

TEACH ZODAWN (TZ) in mi phatuamngaite’ thohkhop lehkhabu hunkhoptak 2012 in Ebenezer Academy (EA) library a koih ding in ana kikhak hi. Tua lehkhabute EA tung taktak hiam chih leh bang dinmun a om a, siamsin naupangte’n hamphatpih taktak uhiam chih amun mahmah a va etkhiat ding chih TZ Steering Committee in hoih kisa hi.

August 25, 2014(Monday), 1:30pm in Ebenezer Academy ah Lian Suantak, Chairman, TZ leh Muanlian Ngaihte, Member TZ va hoh in amun mahmah ah etkhiatna va kinei hi. Sir Liankhanlal, Principal, EA room ah kilut a, siamtak in honna welcome hi. 2012 a Teach Zodawn Team in lehkhabu hon kikhakte amun mahmah a hong en dia hong hoh ka hi uh chih a kihilhleh a’ Dean  uh va mu di’n hon kawkmuh a; azoh chia ama’ kiang a kiiknawn di’n hon hilh hi.

Miss Khamkhanngai, Dean in leng a hun kibichilh kaal ah hoihtak in honna welcome a, ka theihnopte uh hoihtak in hon hilhchian hi. Lehkhabute hoihtak a EA tung ahihdan hon hilh a, amun kidaihlouh ziak in Library ah School’ neihsate leh TZ apan lehkhabu a muhte uh kikoihkhawm, chi. Library a lehkhabute Pawl XI leh XII lamte’n hamphatpih deuh uh chi hi. Achang in student khenkhat in Library apan lehkhabu va kheelzel ua; hamphatpih mahmah un thei hi.

A genzelna ah siamsinte khualna a lehkhabu manpha taktak hon thohkhawmte thupi sa a; himahleh lehkhabu sim lunglut taktak kitam nailou ahihna ah abiik in kalsuanna ding siamsin laite’n nei lian mahmah, chi hi. Syllabus pawlam lehkhabute etna ding hun nei tamlou ua, a subject kia mah ua buaiden hisim uh, chi. Dean nu Class la dia a luut a ngaihziak in Miss Momawi, Lecturer kiang ah library ah kou hon makaih ding in sawl hi.

Library ah student thum-le-li ana om ua, daai sipsip in lehkhabu ana sim uhi. Koule Library veel in, student-te toh interaction saulou ka nei ua, huchi’n Principal kiang ah ka painawn uhi. Principal room ah parents hunkhop ana om ua, ana buaisim hi. Huchikal ah hun-awl hong kibawl in sawtlou ka houlim thei uhi. Principal inleng lehkhabute hoihtak a tung ahihdan hon gen thak a, ama muhdan in TZ in lehkhabu a khakte High School section lamte adi’n saangzek a, a hamphatpih taktak Higher Secondary lamte hizaw hi. Student-te’n a subject uh a focus na lam uah Library a kikoih lehkhabute - outside syllabus khong ahihman in en man taktaklou uh, chi hi. Bangteng hileh a tomlam a gen in Teach Zodawn tungtawn a mi phatuam ngaite kiphalna thupi sa inleh lehkhabu kikhakte a muh in lungtung mahmah hi.

Principal in a genzelna ah naupangte spoken English ah buaideuh ua, teaching English medium a kibawl ahihman in a tangpi in Zodawn a hong kipante’n sikhop simsim uh a, EA a ahong kaai uh kum khatna bang chu English theihsiamlouh ziak in struggle taktak uh, chi hi. Zahkai ziak in a theihlouhte uh bang dong ngamlou in pau leng pautawm uh. Hilele kuhkaltak a pangte’n midang ana kaikai sate phalah tuanlou uh, chi hi.

Principal leng a buaitoh a hun tampi laksak ding kisuanlahhuai sa in houlimna hiaiteng in kikhin a, ka pailam un a gate tan uh amahmah in hong khakhia hi. Principal leh a staff-te hon na kithuahpihdan kilungtung mahmah a, a school hong lohchin a, Pathian deihdan a khangkhia naupang bawlkhiatna school a hong hih touhzel ding lametna lianpi toh kichibai in ka kikhen uhi.

With Sir H. Liankhanlal, Principal, Ebenezer Academy

With Students, Ebenezer Academy

With Miss Khamkhanngai,  Dean, EA.

                                                                                                  

Report gelhtu: Sumthanlian Suantak @Lian Suantak.

Banghang A Awlmoh Ding?

Mi bangzahte'n singnou i suankha himhim ding uam ah. I singnou suante uh a pichin nung in mi bangzahte'n i va veh kha ding uam ah. Singnou khawng i suan a, i theihlouh kaal in a hong piching a, a liim peuh a i va omleh singkung dangte' liim sang a nuamzaw hileh a kilawm a, ei mah suan ahihziak ahiam ah lawptuam in a om mahmah hi. Ahihkaleh ei mah haichi tuh apan neek khawng ana nuamse leh limse a bang hi. Bazar khawng a tangmai i lei a i neek toh huan hiam, lou hiam a ei mahmah tuhsa neek tuh a kibangkei hial hi. Lungsim guuk ah kipahna leh lungkimna khat a om a, hihkha leh lohching kisakna khat a om hi. Ei mahmah khut a i chiin sing leh loute nangawn in tua bang kipahna ahon tutleh, ei khut mahmah a i kep, ei tha mahmah toh i khoilet mihing in kipahna bangzahta ahon tun dia!

Tulel dinmun in zodawn a naupangte panpih ding thil haksa lua ana hi hetkei zaw hi. Khopi a hotel a khatvei i an neek man in naupang khat khakhat-khanih a vaakzou. I puannak khat man in naupang khat kumkhat sung a skul fee a sutuahzou ding hi. Puanak khenkhat ngial in houh naupang nih-le-thum a vaakzou ding. Kum khat a teng sangkhat thoh ding huchipi in haksa khollou ding a, himahleh tua teng sangkhat in zodawn naupang khat tung a a nnasep theih thupi mahmah hi. Huchi hinapi in gintaak sang in i thoh hehu kholkeizaw uhi. Bang in hon suthasial ahia? Bang in hon thadahsak ahia? Bang in hon kithalawpsak zoulou ahia?

Khovel hinkhua tuh ei kia, ei unau kia, ei innkuan kia ahi gigekei. Huchi ana hitaleh banghang a mi tampite'n chikmah a atheih ngeilouhte uh adia gim leh tawl ana thuak ding ua, a hinna natan uh ana pe ding uh ahia? Tuma kum bangzah hiam lai a pawlkhatte'n amau' nopsakna sang a midangte' khanloh ding a awlmoh zawk ziak ua eite'n  huai bang mite' kipiakzohna gahlou a tu a khopi-khota a nuamsatak a khosa i hikei ua hia? Mite'n huai hunlai a amau nopsakna khelah a ei pawl honna buaipih peihlou hile uh tu in koi ah i om ding ua? Ahihleh tu a amaute' kipiakzohna gah lou a, khangkhia a nuamsatak a i khosak tak a en ei liangkou a kinga mohpuakna limsak nuamlou ding i hi ua hia? Tu a a khosaktheihna ama' tha liauliau ziak ahi chia kisathei a, haksazawte panpih ding thasial a omleh theihsiamlouhna in a mit a hihmial a, mawlna in a lungtang a tuamchip ziak ahi ding. Khang tampi a mi tampite' gimna leh tawlnate' ziak liauliau a michih tua i tun tan tung i hi. Kuapeuh, a sangpen  leh a thupipen tan in, hiai ah i awk chiat a, kisiamtan thei ding khat mah leng i omkei.

Tua bang a nnahoih sepna tuh phattuam ngaihna leng ahikei. I sep ding him ahi. I mohpuakna ahi. Seplouh theihlouh thil ahi. I sep nopkei leh mite' tha athawn a nenu-nepa' tung ah tunggikna akhang-akhang in a om ding. Mite'n tua bang a mohpuakna akhang-akhang a paisawn tha-ittak a asep seuhseuhlai ua ana om maimai mite tuh tua mohpuakna apan awlsak a a-om hun chiang un a kipakkei hial ding uhi. A septheih hun ua sem nuamlou khang tuh sem theilou ding a zawngkhalsak a hihchiang un thaman a sakei hial ding uhi.

Huai a tuma hun sawtpilai a chikmah a hon thei ngeilou, imel-ipuam kibatpih le hiloute' sepgah mu a tu a hiai tan i tun nung a tu in eite'n tua mohpuakna sunzomkei le'ng tunung chiang a i khangsawnte uh bangsuak ding uh ahia? Mabaan lam-etnalou in khovel hinkhua bang manphatna a om a? Tua mabaan i limsak nopkei leh bang limsakta ding i hia? I sep theihlouh leh i sep zohlouh phuut a om i hikei a, i septheih chiat, i sepzoh dandan a sem dia phuut i hi. Kua mah kidangkoihkei ni. Dangkoih in om takpi le'ng kua mah i lungkim hetkei ding uh.

Ei' ma a khangte'n a sep ding bang uh aseem uh hiam asemkei uh hiam amau hun abeita a, tu in ei pawl i kipat uh a hunta hi. Kei mahmah in leng hichi bang hun ei chiitchait' liangkou a ahong kingak ding ka ngaihsun pha ngei himhimkei. Huai nna a kidiahkhak ni hong tung ding in leng ka ngaihsun ngeikei. Himahleh tuma May-June 2014 sung a innlam ka va pai a, Sialkal tang khawng a saptuam' skul a sem skulpute' kithuahkhawmna khawng a ka va tel a, Lamka a kai ngeina skulte khawng ka va vehna ah ei tung hong tung peetmahta ahi chih ka va mukhia hi. Tua mun ah skulpu tamzawte kei vual hiam, kei sang a naupangzaw hiam ahi uhi. I mabaan ding ei khutsung ngeekngeek a koih in a om a, i deih dandan a sui thei i hita. Ei ma a khangte' suih bangbang uh mabaan a mu ua, tu in en ei khut sung a om, i sui bangbang mabaan i mu ding hi. Huaiziak in aphual mahmah a bual a, gim leh tawl a pangte leng khanloh a, denchiang a igim-itawlnate a hong thotlouh teiteina ding a chiimtak a ngaihsutna toh i pan uh a kuul mahmah hi. Hiai mabaan bawlna tuh hichia amah leh amah a tuahkhak dandan a mabaan sawn ding a khahzan ding in a paammaih a, phalhuai leng ahikei. Singnou khat amah leh amah in khang leh a ut leh a kawi dia, a ut leh suahlam ah hiang a kha dia, a utleh hiang tampi a nei dia, a ut leh a buk dia, a utleh a heu ding hi. Himahleh tua singkung tuh a neu apan enkol in, ching ngiitngeet le hang  bangtan hiam i deihdan in omsak thei ding hi. I deihdan in i kawisak-tangsak thei dia, suahlam a hiang i deihkei a huailam a hiang  a khiatleh a neulai in baihlam tak in i eukhe thei a, i deihna lam a a khiatte i zuun thei hi. Tua bang in i mabaan bang i deih hiam chih chiimtak a i muh naakleh i khutsung a om i mabaan ding i deih bangbang in bangtan hiam beek i sui in i seek thei ding hi. Tua hilou a etkollouh a nawkkhaak lamlam nawkkha a i paisak le bel i deih hetlouhdan bang in leng i bawlkha thei hi.

Huaiziak in a mun mahmah a bualte hileh, agaal a pan theih bangbang a pangte hitaleng, hiai i nna uh, i liangkou ua kinga, phattuam ngaihna a sep ding hilou, i mohpuak ahihziak a i sep ding i sepna ah kisuuk chiat ni. A ngeingaihlou thei ding kuamah i omkei. Ei mah nopsakna ding leltak sang a nna poimohzaw ahi a, i thadahna sang a poimohzaw thil ahi a, i kisaktheihna sang a poimoh zaw thil ahi. Thadah ziak hiam, kiletsak ziak hiam, kikhothang siamputsak ziak khawng leltak a ngeingaihlouh theih thil ahikei.

Pathian in David kiang a amah David hilou a a tapa in a inn ding lamsak dingahihdan ahilh bang in inn leh lou lam ding awlmoh naikei ni. I tha neih teng in tuate lamkhe ding a mi lamkhe phot ni. En inn leh lou thupitak lam in a kem ding gina omkei leh bang a phatuam dia? Tuate kizen tak a keem ding mi lamkhe phot ni. A huchihkei leh zaw i tha uh i sengthawn phet kha mahmah ding uh.

KFC a aksa i va neek chiang in lim i sa a, i kipak in i lungkim mahmah hi. Khatvei peuhmah i KFC neek taang in zodawn naupang khat panpih sin himhim ni, tua ah bang kipahna a om hiam chepna ding in. KFC neek sang a kipahna buchingzaw leh lungkimna thuukzaw ana omkha maithei ahi. A nei zoulou naupang khat pencil khat keleu hitaleh leng, khatvei leisak himhim mah ni, huai ah bang lungnopna i mu zenzen kha hiam. Neih leh lam a lah huchi lua a mi englou a, lawm leh vual lah nei a, nu leh pa leh u leh nau lah nei a, huchi napi a khovel a lungnopna nei theilou a, kipak theilou a i kitheihleh khatvei mawngmawng hiai naupang panpih ngaite panpih himhim le, i zonzon kipahna leh lungkimna huai ah i mukha mai ding e!

Ateek-akhang kipan ni. Ei mah singliim ding chiat suan kipanta ni. Denchiang in mite amau singliim chiat ah nuamtak in a hong tawldam ding ua, huai hun chiang in tawldam saamna ding singliim neilou in mite en in i daakdaak nuam dia hia? Mite' piakzah leh thohzah i pezou in i thohzoukei kha maithei, ahihkaleh mite’ sang a tampi thohzou i hi maithei. Bangteng hileh ei toh kikhom i panzoh zahzah in thasiallou in pang ni. Tu a i singnou suan denchiang in singkung thupi leh kilawm a hong hikei ding kua'n a chi ngam a? Tua bang a singkung paak kilawm a ahong paak a, liim nuamtak a piak hun chiang in mite'n, 'En dih uh, huai singkung, huai mipa-minu' suan eive,' achi ding uh. Huchia kua hiam in singnou i suan a, a hong let chiang a akipahhuaidan, akithalawp huaidan ngaihsun baanlou a, geel phalou i om leh hiai ka hon gen hi, kei ngei in singnou ka na suan a, tu in lianta in liim leh paak kilawm a peta a, ka suan lai a ka ngaihsut phaak hetlouh kipahna leh lungkimna a hon tun hi.

(Note: Thugelh hoihtak hon pawsuah Pu V. Tunzasiam tung ah kipahna lian mahmah hi. A hoihzaw i gam a ahong pian ngei ding deihna ziak a Teach Zodawn min a suahkhiat ahi.)

~ Chairman, Teach Zodawn Team.

Zodawn siamsin naupangte lak a khenkhat (Khuanggin)

Special Class Railway Apprentices’ (SCRA) Exam

AWLMOH ziak in 1990’s lai khong in High School a heutu khenkhat in class ah, “Na Aim-in-Life bang a?” chi’n a banban in hon dongsek uhi. Ei’ hun a hong tunchiang in dawnlouh theihlouh ahihman in kidingtou, khutkilh zatkawm in, “Sir, my Aim-in-Life is…” chi’n lungsim a hong suak penpen kigenzel hi. Eima’ a gen om lelah huai i ma apa’ genpen mah kibaan gensek. Lungsim a utna taktak le hilou, ngaihtuahna a hong kilang zualpen genkhia khong kihi maimah. Aim-in-Life hoihtak genkha bang a om taak lehle heutute’n abaan genpih dingdan leng thei hi tuanlou uhi. I mawl dandan un ki-awlmohna liantak zaw om ahi na ve.

Huchi’n Aim-in-life ginatak le ana kinei pilou in lehkha ana kisimtou a i tun nana i Aim-in-Life hisak mai! Tulai in ahihleh maban ding lampi hoih pipi kikawkmuh thei i hita ua, i hampha mahmah uh. Huai i chihlai in lehkha sim tengteng’ maban limchi vek chihna ahikei. Deih taktakna nei a kuhkaltak a pang trantran peih na hih keileh puk theihna kawkhuk lampi dungteng ah a pumdim. I career suse thei tampi mahmah technology khan dungzui in i tuak toutou ua, i deihtoh/ i hawmthohpen i sakhau sung ngei ah a omta. Huai mah hon vawk sangtu in na zangthei a, leitual denna a hon neitu mah leng ahi thei. Nang thu ahi.

Employment News khong i etchiang in ‘eimi’ SCRA a lohching muh ding a om mangkei (om nailou le ahi maithei). I phawk khaklouh ziak ahih khakleh chihziak in neuchik beek i matna ding in SCRA toh kisai saulou chik ka hon gelh hi.

SCRA exam 1927 in British-te’n train-lam etkolna hoihzaw ding geelna in ana pan uhi. Tulai in ahihleh Union Public Service Commission (UPSC) in saita hi. Post awng a tamlouh toh competition a khauh mahmah ziak in baihlamtak a muhzoh leng ahikei hi. Theihsiamna di’n mi-10,000 lak ah mi-1 khong select hisek hi. 2013 Exam ah vacancy 42 kia ahi.

Hiai Exam a teltheihna di’n kum 17-21 kaal mi hih ngai a, ST-te adi’n kum 26 tan inle apply theihlai hi. A niampen in Class-XII 1^st/2^nd Division beek a passed ngai a, Maths leh Physics/ Chemistry subject a tawikhak ngai hi. SCRA Exam stage thum pha hi:-

1.       Written Objective type hi a, negative marking om hi.

2.      Personal Interview leh

3.      Medical Examination.

Online a apply ngai a, ST-te adi’n fee piak ngailou hi. Imphal leng Exam Centre khat hikha hi. Hiai Exam a lohchingte kum 4 (Semester-8) BIT, Mesra, Ranchi ah training sak ua, training sung in stipend Rs.9,100/-p.m. apan Rs.9,700/-p.m. khong pia ua, hamphatna dangdang: Medical benefits, privilege passess leng mu uhi. Huchia Training hoihtak a azoh ching un Bachelor of Engineering degree in Mechanical Engineering ngah ua, Indian Railway Services of Mechanical Engineers (IRSME) Officers kaam hoihtak piak hi uhi. Kha 16 khong Probation sak ua, lungtun huaitak a etkhiatna a zohchiang un Govt. Service ah Railway Officer hi ngal uhi.

A tangpi in October kha khong in SCRA Exam toh kisai notification suak in, November kha kimtan khong apply theih a, a Exam ahihleh January 20 kiimlak khong hisek hi. Engineer(khatpeuh) na lunglutna ahih a, Class-XII zoh a Professional line sum tampi seeng a zil haksa na sakleh nang adia Career option hoihtak hi kha ding ahi. Tukum inle bengvaktak in ana ngak lechin SCRA Exam notification hong suak hak nawnlou maithei eive.

For summary for 2014 exam:- http://www.jagranjosh.com/articles/upsc-scra-examination-2014-notification-1380951103-1

[Note: Hiai article hon contribute-tu Lian Suantak, Chairman, TeachZodawn Steering Committee ahi a, akimzaw en nuamte’n ama’ blog http://lian-suantak.blogspot.in/2014/07/special-class-railway-apprentices-scra.html visit theih ding hi.]

Teach Zodawn Sponsor for 2014-15

Teach Zodawn Sponsor For 2014-15

Kum 2010 a kipan Zodawn a Siamsin naupang lam chituamtuam a haksatna tuakte – a Admission & Tuition Fee uh piaksak a panpihna Teach Zodawn min a kibawl, mi phatuamngai awlmoh tute ziak in tatsatlou in tunitan paitou theizel a, hiaitan hon pitu Toupa tung ah amasa in kipahthu i gen hi. Tukum inleng Pathian in khuak hoih taktak a piak naupangte zawnna ziak a asiamsinna uh sukbuai a omtheite veina liantak toh a Tuition Fee uh piaksak a panpihna piak tum in mi 11 ki-sponsor sawm nawn hi.

Amaute hiai a nuai a bang ahi

Hill Model High School, Singngat (Manipur) apan:

Sl No	Min	Pa/Nu Min leh khua	Class	Admn Fee	Tuition Fee	Total (Rs)
1	Mr Gensuanmuang	Chinlam & Enchiin of Lungthul (L)	VII	550	300	300x11=3300/-
2	Ms Vungthianlun	Pumthantuang & Biaklian of Singngat	VII	550	Free	=550/-
3	Mr Khailemlian	(L) Khaineihlam & Nemthianchong of Singngat	IX	550	300	300x11=3300/-

Convention English School, Sinzawl (Manipur) apan:

Sl No	Min	Pa/Nu Min leh khua	Class	Admn Fee	Tuition Fee	Total (Rs)
4	Mr Songkhanlian	Pumkhoson of Sinzawl	VIII	900	350	350x10=3500/-
5	Mr L Sanglun	Siamthansang of Sinzawl	VI	800	300	300x10=3000/-
6	Mr Pausianlian	Vumthanthang & Donzaniang of Phaitong	IX	900	350	350x10=3500/-
7	Ms Mary Vungneihlian	N Chinzanang & Ngaisangching of Songtal	VIII	900	350	350x10=3500/-

Grace Model School, NE Tangnuam (Mizoram) apan:

Sl No	Min	Pa/Nu Min leh khua	Class	Admn Fee	Tuition Fee	Total (Rs)
8	Ms Manbiakching	Nengzakham of NE Tangnuam	VIII	250	250	250x11=2750/-
9	Ms Malsawmkim	Luaiminthang of NE Tangnuam	V	250	250	250x11=2750/-

Emmanuel Academy, Teikhang (Mizoram) apan:

Sl No	Min	Pa/Nu Min leh khua	Class	Admn Fee	Tuition Fee	Total (Rs)
10	Mr Pausuanlian	Chiinsianmuang of Teikhang	III	20	210	210x11=2310/-

Covenant School, Mualkawi (Manipur) apan:

Sl No	Min	Pa/Nu Min leh khua	Class	Admn Fee	Tuition Fee	Total (Rs)
11	Mr Kapminmang	Ningmuankim of Pearsonmun	III	1300	400	400x6=2400/-

Note:      i)  Sl. No. 6 & 7 tukum a ki sponsore thak ahi

                ii) Sl. No. 2, 3, 10 & 11 – mimal a sponsore tu omta

                iii) Sl. No. 11 – na pen kha 6 kia ki sponsore ahi

Hiai atung a naupangte panpih nuam a om leh chiklaipeuh in  Teach Zodawn Steering Committee te thuzak theih ding hi. Kha 11 hiam hitaleh I lemchan bang in sponsore theih ding hi. Huchilo inleng neih lemdan et in a tamlua-tawmlua chih omlou in Teach Zodawn nasepna kithuahpih theih gige hi.

Internet tungtawn a panpihna pe utte a din hiai account ah khak theih ding hi

Min:                       T VUNGH BIAKMUAN

A/c No.:                 30688164496

IFSC Code:           SBIN0001076

Bank Min:            STATE BANK OF INDIA

Branch Min:         R K PURAM BRANCH

Sum luut leh pawt te hoihtak a kichiamteh ahih manin kuapeuhmah panpihna honpe ten Finance Secretary theisak din iki ngen hi.

                                Chairman:            Sumthanlian (8860188616)

                                Secretary:              Thangkhanlian Guite (9999776623)

                                Fin Secretary:       T Vungh Biakmuan (9971391983)

Teach Zodawn Steering Committee sik-le tangin

Chairman, Teach Zodawn