Zodawn A Ma Pang

“Tuni secretary pu in hon neekpih ngailou di hia. Amah sepna muthak. Na chikei ua hia?” Khampu in achi a, Muanpu’n, “Ahi mawk di hia! Nou n'on lopsak di uh azaw voi!” chi in a kichiamnuih uhi.

“Koilak a hon koihdek uh a U Muan?” Chiinnu in a dong a, “Bukpi hitel veh,” chi’n Muanpu’n a dawng hi.  “Bukpi hi in Lamka hileh kibang hilou maw. Va pai sese ngai lah hi tuanlou a. Innmun a sep theih thou bang,” chia Chingnu in a hon kup leh Muanpu’n hi sa hetlou in, “Huchi hisam khollou e. Mohpuakna i neih leh tuh gin-om tak a sep ding himai lou di?” chi’n a dawng hi. “Va pai sawm na maw?” Nemnu in a dong leuleu a. “Pai zenzen e. I pailouh thahah in,” Muanpu’n a chi hi.

Ginpu’n, “Kare, nang a fel pen in n’on paisan in ah i buailaw kei dia. Mi’n le a galsep thou ve ua le. Huai Bukpi va om di chih ngeeknguuk le. Adu, ka naak eng utlouh,” chih leh nuih a thuah hi.

Nuikawm in Muanpu’n, “Chiamnuih in i gen ua hive’n, ke’n thutak in hon dawng le’ng. Kum hiaitan huchia zawntat tak a i na om ziak ua a gah i loh uh i muta ve ua le. Akoilam-akoilam ah le’ng i niamkiat ua, ikiim-ipaam a nidang a i simmoh mahmahte’n hon deep gawpta uh hilou hia. Pathian’ gawt nangawn le ngai zezenlou a eimah leh eimah atawzepna a kizang hang a. Tu a i khanlohkei leh puukse peetmah ding i hi. Na chisamkei ua hia?” a chi hi.

Huai chiang in Chingnu mah in, “Huai le dikzel mah e maw. Hilele huai singtang kawm a va om di a uthuaikei lawngal voi,” achi leuleu a, Muanpu leuleu in, “Bang oi a noplouh na’ng. Ke’n lah nopchi ka sa lua a. Tuma kum tampi a i ginatlouhna tengteng uh bawldik dia nnasem ding i hihman in haksa lele i sep tangtang mai di uh hilou di hia. Hiai kitunding thakna tuh i nopsakna, i ut leh utlouh chihkhawngte’ sang a poimohzaw nna ahi a, nopsaklouh leh utlouh ziak khawng a khawlsan theih hilou ahi. Ko’n thutak dawnlaw gumgum hia? Ke’n hiai khawng awlmoh ing a, huaiziak tak a le hiai sepna ka delh ahi. Lohmuhna ding kia hilou a, inam-igam bawlna ding. Huai mah himailou hia Pathian’ nnasep i chih,” achi a, anui nanalh hi.

Nemnu in, “Miteng in huai chithei vek le chihhuai mah ve. Hileh chik khawng chia kuan di oi?” Muanpu’n, “Thei nailou. Order hong tun hunhun hi’n teh. Khanih-khathum nung khawng a diam maw.”

Chingnu:, “Bukpi ah ana om le teh khatvei k’ong zin nainai di uh. Muh le a uthuai thou voi.” Muanpu’n, “Hithamtham e.”

Nemnu in, “Ngut a, singtang lam khawng a skul hoih le om khollou di hia maw. A siamdeuhte a di scholarship chih khawng om henla, Lamka khawng ah kai le uh deihsak huai uh ka sa,” a chihleh Muanpu, “Ke’n lah amau siamsinna ahon delh di uh hilou in siamsinna eite’n a kiang uh i va tut ding uh ahi ka chi zaw a. Thilteng Lamka ah chi vek hang a, zodawn lam limsak himhimlou hang a, denchia i hihkhelh a hong kilat vanglak chia hong poisau law di ahi. Saptuam hileh, khotang vai hileh, thil teng Lamka chi vek tel hang a, i demdem Meiteite’n thil teng Imphal a chih uh mah eite’n le zui hi nilouh hang a.” Nemnu, “A diklaw zel ka chi. Ka gen di le ka thei nawnkei,” chihleh nuih athuah hi.

Hiaite lawmtate ahih uleh Lamka Bial tuailai dongta (committee member) tutkhawmna nei ahi ua, a tutkhawm zoh ua kikhen ma a kichiamnuih tuah veel ahi uhi.

Muanpu ahihleh Vengnuamte ahi a, Delhi a MA zilzou innlam hong pai a, solkal skul a teacher ding laakna a ava kihel leh hamphathuai tak a va chingkha a Bukpi a koih a om, a kuanna ding thupiak nanung ngak a omlel ahi. Amah Lamka bial tuailai pawl dongta sung a a secretary leng ahi.

A nung sawtlou in Pathianni nitak khat pastor pa leh upa khenkhat in, “Muanpu in le sepna mu ahihleh va hoh zual le hilou hia?” kichi in Muanpute inn ah a va hoh uhi.

Kongkhak kiuh leh hon thuah in pastor pa’n, “Kuakua na om ua?” a chi a, Muanpu’n, “A om teng kim ung ei. Hong tu un. Bang chi sim na hi ua?” chi in ana vaidawn hi.

“ Eh, bang le hipikei. Nang skulpu ana ching chin a, en ana theipahlou hang a. Hon kipahpihlua i ka hia,” chih leh luut athuah uhi. Muanpu’n, “Ching kha mawk i ka hia,” chih leh tutna lah athuah hi.

A tutlem nung in Upa Daikham in, “Hileh koilak khawng a hon koih di uh eita? Huchi bang thu omta hia?” chi’n a dong a, Muanpu, “ Omta mah ei. Bukpi tangkha ve’ng aw. Mundang gamla pi khawng tankhak di ka lauhlauh toh. Ei gam mah kitangkha a, kizen mahmah.”

Pastor pa’n, “Hileh nang zaw na paikei di maw?” chia a dot leh Muanpu’n, “Pai mah ning. A hiai mah i awlmoh ziak khawng a lut kihi a, ei gamlou i tankhak di i lauh lai a ei gam mahmah tangkha hang a, Pathian in thumna hon dawng himai lou di hia.” Pastorpa leuleu in, “Huchia nang i veng uh na pawtsan mawk leh tuh i saptuam in bahloh mahmah di eive. Tuailai pawl lah nanglou a bah mahmah ding a. Mi’n le midang sawl thou uh hilou hia. Mi dang sawl di zong mai lechin ei voi. A khote uh Lamka khawng a pawl sawm-sawmlenih zouthakte khawng utlaw di uh ahi. Huchia  a omkei hial uh lele a pammaihlou deuh khat i sawltou na ke,” achi hi.

Muanpu’n, “Huai zaw a hithei law na dia, hilele i gam a siamsinna khawng mah i lunglut leh awlmohna ahihziak a naa dang tampi omlak a hiai mah ana kidelh teitei hi a, tua hichi bang a Pathian in hun lemtang hon bawlsak nung a kithalawptak a sep ding himailou ding hia ka chi a,” achihleh Upa Lalphung in, “Huai le himah ei. Singtang lam apan a pil leh a hithei deuh teng Lamka hong kidenna ua, Lamka apan apil leh siam teng vaigam-sapgam kidenna zel hang a, i gam keem di gina ki-om hetlou ei mah ve. I gam puah taktak ding i chih leh tuh tua bang a mi kipezou tampi kuul di hi mah hang,” ana chi hi. Muanpu’n, “Pathian nnasep i chih khawng thildang thupilua le a hikholsam a maw. Hichi bang a i mohpuaknate khawng kizen leh gin-omtak a sep khawng himailou hia maw.  Mosi toh kibang himai i ka hia. Eita-einau, ei mah mi leh sate’ don kawmkawm a sumloh ding chih hamphathuai lua eivoi. Sumloh ding hikei lele ita-inaute tuh i don ding mah hi ua,” achih behlap hi.

Huai chiang in Upa Ginkham in, “Nang bangbang mi li leh nga bang om le hang tuh i gam hong khangkhe pah ding eive.  Ei lampang i ngaihsut chiang in manhuai abang a hive’n. Lapu lah hi chin a, na paikhiat di zaw phalhuai hetlou na ka. Bukpite’ nakpi in na va tokhalh mai kei dia hia,” chi’n a hon kum a, Muanpu’n, “Khai, huai bang na chi zezen ua, ka om in le bang ahi tuan a eita. Omkei leng le ka omlouh lam le na theikei hial di uh,” chia a dawn leh Pastor pa’n, “Theilaw di hang a thawmhau lawkhol i ka hia. A’ihleh ke’n kipahthu genna dan in thumna k’on nei dia huchi’n i paiphot uh awle eile,” chi in thumna nei in a pai phot uhi.

Kha bangzah hiam nung in Muanpu le’ng Bukpi a va tung a, a gintaak bang in skul ana gina hetkei a, a hihtheih khom a panlaak sawm in a hahpan mahmah hi. Skulpu ngeinate’ hihdan toh kibanglou in naupang a enkol a, naupangte’n leng a ngaina se uhi.  Naupangte hih thathoh a, kithalawpna got a, a ngaihsutna uh tokthoh a,  amau a hihtheihna ompen zonkhiat sawm in a hahpan mahmah hi.

A lawmte kiang ah, “I mohpuak tuh naupangte kiang a ngaihsutna piak ding hizawlou in ngaihsut didan sinsak ding ahi zaw,” a chi nilouh hi. 

Nikhat tuh class a luut phet naupangte’ kiang ah, “Tuni laisimlou ding. Na laibute uh na kawlzaal uah guang chiat uaih. Man chiatta maw? Hon zui ua lem,” chihleh pawtkhiat a thuah hi. Naupangte’n leng bang thu hi hiam chia lamdang sak leh zuihpawt a thuah uhi.

Skul kiang, khonawl a gamlak ah a va vaakpih a, “Banghang a nahteh khenkhat ngat a khenkhatte lian hiam? Banghang a khente san a khente hing hiam? Khente singkung lian hi ua, khente loupa hi ua, banghang a tua bang kuul ahia? Na muh uleh na zaak peuhmahte uh chiamteh un aw, huai toh kisai essay gelh chiat ding na hi uh. Manglian, nang bang beh?” chi’n a dong a, Manglian in, “Naulak,” chi’n a dawng hi. “Lunniang, nang la?” chi’n a dong nawn a, Lunniang in, “Kou Tombing,” chi’n a dawng hi. “Banghang a beh chi tuamtuam khawng om hiam? A hoihna leh hoihlouhna bang ahi dia? Khenpau, nang bang saptuam?” chi’n a dong leuleu a, Khenpau in, “Kou PCI,” chi’n a dawng a, “Ngaihlun nang la?” a chi nawn a, Ngaihlun in EBC ahihdan a hilh hi. Huai phet in, “Banghang a saptuam om hiam chih na ngaihsun ngei uh hia? Hiai tengteng essay a na gelh vek ding uh, kal nawn sung a n’on piakluut chiat ding uh,” chi in naupangte sawtkuam a vaakpih nung in a kiikpih hi.

Huai ni skul kaitawp pailam in, Lianching toh kiton hi ve un, Lianching in, “Tuni naupangte koi a va vaakpih e,” chi’n a dong a, Muanpu’n, “Khonawl gamlak kho va vaakpih maimai hi’ng. Bachia e?” chi’n a dong kiik a, Lianching in, “A himhim thu a k’on dot hi. Na naupang etkoldan hoih ka sa,” chi’n a dawng hi.  “Naupang i chih khawng thil manphapi ahi. Mi manpha ahong hih ding leh dinglouh uh ei a enkoltute khut a kinga phalua ahi. Naupang’ lungsim zalentak a a khantouh theihna ding in hichi bang khawng poimoh hi in ka thei. A phatuam diam bel ka theikholkei,” achi a, Lianching in, “Ei voi. En tuh naupang khawng ei peihtan kia a keem hang a, amau a hihtheihna omte zongkhe taktak ding leh hanthawn taktak dia pan kila peihlou eimah ve. Tuzan chiah hong pawt ve maw. Neeklim ni,” chih leh peet dia kisak a thuah a, Muanpu’n, “Laigelh di ka nei zek a, hong pawt hon sawm himhim leng,” chi’n a kikhen uhi.

Lianching ahihleh Bukpi khomi, Lamka a pawl sawmlenih a zoh nung a mi’ tang a skul a seem ahi. Muanpu ana deihta mahmah a, himahleh Muanpu’n a deihbawl nuamkei hi. Sawtpek a pan in Zamthang, huai skul a headmasterpa’ tang  a sem, Bungmualte, in Lianching deihta a, himahleh Lianching in a deihkei hi. Tahal in Zamthang ta nuamlou in Lianching a zui nilouh hi. Tua Muanpu a hong  kilat tak a Lianching in limsaklua a atheih ziak in a guuk in Zamthang a thangpai mahmah hi.

Nikhat Zamthang leh a lawmte Muanpu’ tungtang a houlim kha ua, Zamthang in, “Huai Muanpu le a omsawt leh hoih het ke’n teh. Lianching in lah deihta mahmah ve’n, a pate’n lah deihbawl mahmah. Kintak a sawlmang zok di eive,” a chihleh Manggou in, “Nang na skul ua head len hilou na hi? Zial suk leteh sawt ompeih thahah kei di. Dawmkei hial in,”  chi’n a fuih a, Zamthang in, “Ka bawl didan theilou keivoi. Hon ngaihsut pih dih u e. Nang le Tuailai pawl a member neivoi. Muanpu a secretary hilou maw? Hong tung panpan in houh a sangpen hong tangkha laitei a. Huailam a hihtheih na neihleh ana nuaizek leteh ahoih di,” achi a, Manggou in, “Ka iplah simsim hun tam mah e. Lamkate’ chihman a miteng in pilpen dia koih gige ua. A thuthu a pai huuthuut ua. A nialngam le omlou uh,” chi’n a lungkimlouh thu a gen hi.

Lianching’ nu leh pate’n leng Muanpu a deihbawl mahmah ua,a Lianching mah leng numei etlahhuai kuam ahihman in a sim thuhilh gige uhi. “Na U Muan le a hong pawt vaang e. Hon deih bawl ngellou hia leh?” chi’n Lianching’ nu’n a dong a, Lianching in, “Theikhang. Hoih taktak a zaw hon houpih zel hia. Hong pawt utlou tuh hon deih zoukei deuh a himailou ding hia,” chi’n a dawng hi. Lianching nu’n, “A hon deih theihtheihna di’n om inla, kipezou tak in vilbawl leteh hon deihpah di ahi. Hichi bang tangval hoih khawng khahsuahlouh teitei na sawm di ahi,” chia a thuhilh leh Lianching in, “Zezen teh nang le. Mi’n hon deihkei leh va huchi kitah tel kei le,” achi a , a nu’n bel, “Mihoih tanzohna di’n tuh kitah a kuul leh i kitah mai kei di maw,” achih behlap hi.

Nikhat Zamthang in Muanpu a dantan sung ah a sam a, “Muan, huai naupangte class apan pikhia a  gamlak peuh a na hohpih zel pen hoih ka sakei. Tawpsan di’n ka hon deih,” a chi a, Muanpu’n, “Hoih na saklouhna ziak hon gen ve,” chia a dawn leh Zamthang in, “Huai na patpih apan hong kizalensak diak uh ka sa a. Baan ah gamlak a gulsia-tangsia lak ah tuahsia tuak le uh a thu lianlaw di ahi,” chi’n a dawng hi. Huai phet in Muanpu’n, “Skul dan a bohsiatkei naak uleh bang a poina om a eita? Zalen ding mah a i sinsak hi ve un. A siamsinna uh suangkul bang ahihlouh ding ahi. Zalentak a a ngaihsutna uh a kilamtouh ding mah hilou hiam? Tuahsia va chih a le lampi khawng a a kisuihpaih ua liamna a tuah di uh lauhziak a naupang inn omsaklou hi hang a maw,” chi’n adawng hi. Zamthang atolh ut dekkei a, “Nang leng tua bang a na hihpihna ziak na nei ding a, ke’n leng ka hon khouhna ziak a om. Ke’n thuneitu hihna ka let laiteng tua bang na hihthei nawnkei di,” chi’n hehsim in a gen a, Muanpu’n leng thangpai sim in, “Tua bang a theihsiamna neilou in thuneitu hihna a let khak skul adia vangtahna eive,” chih leh pawtkhiat a thuah hi.

Huai ni’n Muanpu a kingaihtuah vungvung a, “Toupa aw, na hon sawlna hi ngei ding a gingta in hiai nna kithalawp tak in ka sem a, himahleh ka gintaklouh lamtak ah haksatna ka tuak a, bang loh ding ka hia? Khouhna ka tuahte nang khouhna bang in ka ngai ding a, tawpsan dia hilh a omte ka tawpsan ding. Thei ka kisakna ana bukimlou leng ahi ding. Hehpih in theihsiamna hon guan inla, mailam ah hon pizel in,” chi’n athuum hi.

Hun hong kivei in buhlaak a hong hun a, buh laak tha-it in a buai thei mahmah uhi. Lianching in a lou ua kuan ding in Muanpu a zawn thapai a, Muanpu leng ut kholkei mahleh nialnial nadan thei nawnlou ahihman in khatvei tuh ana aw khong hi. Kiginni zingkal khat Lianching in Muanpu a va tawn a, Muanpu in leng kithalawp ngellou in a zui nalnal hi.

Lou a tun in Lianching pa’n Lianching’ kiang ah, “Hua’h buuk khawng ah na UMuan a na ompih maimai in, buh lah a latheikei hial dia,” chikawm in ma pang ding in a kisa a, Lianching in, “Amah houh kithalawplua ei ngal ve,” chih leh kawite piak a thuah a, Lianpu’n, “Hih theihlouh chih omsamlou e,” chi’n buh at ding in a kisa hi.

Nitaklam a hong hi a, buh vawzou in giah ding tungtang khawng hong kikum uhi. Loukuante lak a khat in , “Tukum innteek pa’n buh hau mahmah ei. Tuga zawn bang phathei leh kilawm veh e. Tulai hichi zahzah khoukhia le ki-omlou a. Muanpu in houh vaang hon pawluut ahi di,” chi’n a chiamnuih hi. “Kua giak di na hi ua?” a chih behlap a, Lianching’ pa’n, “A dang teng pai unla, Muanpu leng louhgiah himhim ut ahihleh kei, Lianching leh Muanpu ka giak di ua himai,” achihleh Muanpu’n, “Giah ka ut thou na a, zingchiang Pathianni eive, Sundes skul ka lap ngai di hi veh aw,” chi in giah lem a saklouh dan a gen hi. Huai phet in Lianching in, “Lungkhamhuai lou. Zingkal a pai di hang a, kikhop lap mahmah na di i hi. Lougiah ut na chichi a, khatvei mawngmawng na giak himhim di. Na theih gige di’n. Khua a mial dek man. Koi, an kon huan somsom di,” chi in a khou teitei hi. Muanpu’n leng nial tuan nadan theilou in giak ding in a kisa mai hi.

An a neekzoh un Lianching pa’n a thau kuahkhia in, “Sa ka va tang di. Tulai sakhi a hawkhawk a. K’ong zaantaam lele honna lunghimohkei unla,” chi in a vaakkhia hi. Muanpu leh Lianching in dai zikzik in mei a awi ua, sawtsim nung in Muanpu’n, “Ihmut suak veh. Lum ni aw. Kei hiailam pang ah aw,” chi in buk pang langkhat lam ah a lupna di a bawl a, Lianching in leng ama a ding a bawl sam a, a lum uhi. Muanpu’n Lianching pa’ lungsim theilua ahihman in pilvan theihtawp in a pilvang hi.

Zingkal in bel tak a thou in sundes skul lap ding in innlam a zuan uhi.

A zinglam chiang nitak zansawt nung khat a inkuan ua mei awi a a om lai un Lianching’ nu’n Lianching’ kiang ah, “Na U Muan in bangmah thu hon genpih ngeilou hia? Pawt le a hong pawt mengmeng kholkei a,” chi’n a dong leuleu a, Lianching in, “Bangmah hon genpihkei,” chi’n a dawng hi. A pa’n, “A hichi kisaktheih vial leh zaw nawk ek ding ing a, maikha di eive. Bang kisa a hichi huaihak phiangsan ahia. Ka dawm hetkei hial di,” a chi phanphan a, Lianching in lah, “Ka pa khemkhem le, mi’n hon deihkei leh bang hehna di om khemkhem sam a,” a chi a, a pa’n, “Ka thang apai himhim,” achi numnum hi.

Kumte bei ding in hong kisa a, Muanpu leng a kumkhat nna zou in innlam a va pai phot hi. Mas leh kumthak zangpan a kisak kaal in skul luut a hong hun nawn pah a, a zintou nawn hi. Kum kim khawng hong sempan himahleh a khote un paakta uh ahihman in tukum in naupang tampi a ngah ua, saptuam’ skulte bang kiam kholoh uh ahihman in saptuam upa khenkhat in Muanpu a muhsiamlouh loh mawk ua, nidang a a pahtaak mahmah uh, a thulaak ua, a thudon mahmah uh himahleh hiai thilte khawng ziak in a gaalbawl maimah uhi. Muanpu in leng a omdan uh kikheek a haihloukei a, himahleh a kitheilou sak hi.

Pathianni khat Muanpu’n a skul naupangte khonawl a Kulung kawl ah a hohpih a, vangsiathuai tak in naupang kum sawmlethum mi Thuathuam khou sangsim tak a pan a kia a, a kheguh a tattan kha hi. Huai phet in Thuathuam’ pa’n Hausa innpi ah Muanpu a heek a, “Muanpu ziak in ka tapa a khe atan a, mibanglou a suak maimah. Ngeina bang in a paithei nawn ding hiam chih le genngam ahikei. Kua sawl le hilou a, hiai Muanpu’n a kiteisak ziak a Pathianni chitchiat a gamlak a vakpihna thu ah ama moh ahi a, hiai tungtang ah Teng nuaikhat sang a tawmzawlou a gap ding in hausate’n hon vaihawmsak un,” chi’n hausa innpi ah athuum hi. Hausapa pa’n  Muanpu’ kiang a, “Muanpu’n hiai ngohna toh kisai ah gen ding bang na nei a?” chi’n a dong a, Muanpu’n bel, “Moh mah ka hi chihlouh gen ding dang ka nei kei. Pha na sak bangbang in ka tung uah vaihawm un,” chi’n a dawng lel hi.

Hausa upate gennop-saknop neite adia hun a hon lai un Lianching’ pa’n, “I ni siangthou Pathianni nangawn tanglou a tua bang a naupangte hun zatpih tuh naupangte pikawina leng ahi a, ahoihkei himhim. Huaiziak in hiai tungtang ah akua-akua in leng a pilna ding in a kituak bang gap hi ngeingei hen,” achi phanphan hi. Hausapa’n, “Muanpu’ seppih skul lamte’n Muanpu gupthu hiam, guplouh thu hiam gen di na nei uhia?” chi’n a seppihte kiang ah a dong a, Zamthang  a hong ding a, “Nidang in skul naupangte tua bang a gamlak a vakpih zel lai in hichi bang a om khak ding ka lauh man in ka na khou a, himahleh a takei. Pathian mahmah in leng awilou ahi ding. Gap leh gaplouh thu bel bangmah ka kumkei ding, himahleh mohtansakhuai bel ka sa,” chi’n ahon gen hi.

Hausapu leng bangtan hiam a kingaihsut dedu nung in, “Muanpu’n tua bang a ngohna teng za a, nialna ding nei tuanlou na hihleh moh mah na hi chihna ahihman in teng Nuaikhat hilou in teng singnga liau ding in hausa inpi in ahon thutan khum hi. Kha nih sung a suvaiveng ding a theihsak na hi,” chi in thutanna a bawl hi.

Muanpu tuh a lungzing mahmah a, a sumliau pen leng naa a sa zezenkei a, kua mah amah gum a pau ding khat lel leng a om tellouh a pawna mahmah hi. Zankhotawn in a kingaihsun a, a ihmumoh keei hi. Ak bang hong khuang cheelchuulta ahihman in, “Awlmoh tak a ka pan a bang a ka lohtaak! Innlam ah ka pai dia, midang ka sawl mai di,” chi’n thupuukna  abawl hi.

A zingchiang skul kaitawp pailam in Lianching’ kia’h, “Ka taang a di mi ka muh leh innlam ah ka kiik mai di,” a chi a, Lianching in lamdang sa tak in, “Chihmawk, bachia eita?,” chi’n a dong a, Muapu’n, “Ka om in leng bang thupi ka semkhe tuan sam a. Mite’ hoihlouhna na di phet semkhe lel in ka kithei a. Ka pai mah hoih ka sa zaw,” a chihleh Lianching in, “Na khemkhemlua. Mi’n a hon phakei ua, ahon huphulh ua hon hichi bawl uh amai voi. Tomchik thuaklai leteh denchia vualzou khong di na ka. Na dikna hong kilat vanglak chia hong kilangkhe mai di ahi,” chi’n a hehnem a, himahleh Muanpu’n, “Hithei ka sa nawnkei. Ka pai mai di. Neklim phot awle,” chi in peet ding in a kisa a, Lianching in leng, “Nang le neklim. A na kingaihsun thak ou,” chi in a kikhen uhi.

A zinglam chiang sawtsim nung in Muanpu’ a ding laithon khat a hong tung a, bang hi mahmah ding hiam chia a hon leh Zonal office apan ana hi a, tu a headmaster hi lel mualliam ahihdan leh thuthak omma ama’n headmaster hihna len tadih ding a theihsakna ana hi a, a sim khit in Lianching a pia a, Lianching in skulpu teng zaak ding in a simkhia a, Zamthang in a zaak in  thangpai sim mahmah a, lah gentheih bangmah a neikei a, lakloh tak in a om hi. 

Pailam in Lianching in, “Tu’n la na pai teitei diam?” chi’n a dong a, Muanpu’n, “Kua hiam khat in pai dia hon deihlou ahi ding. Ka pai teitei le kilawm ka sakei zel,” a chi a, ann neeklim kikhaak in a kikhen uhi.

----------------------------------

Note: Hiai Article hon thohtu Pu  V. Tunzasiam tung ah kipahthu ka gen hi. Sinlai nei phuahtawm tangthu ahi a, hiai a min, khua leh character kigente etsakna mai a zat ahi.  ~ Chairman, Teach Zodawn Steering Committee.