Deihsaktu leh kalsuan khawmpih, lawm-le-vual te' kithuahpihna sithuai hetlou te ziak in, Zodawn Siamsinna leh Zodawn Siamsin naupangte' makhual (siamsinna) hoih zaw diing ngaihsutna toh, Teach Zodawn minsuanga i kalsuan khawmna uh, tu'n kum 3 chingta hi. Ebenezar!
Neihval hilou a, neih luat man leng hisamlou, awlmohna leh veina taktak na toh; itna leh deihsakna ziak toh; Zodawn naupangte' leng Pathian in apiak, akhuak uh hoihtakte azat khiak theih ua; gam-le-nam khuampi ahong hih ua; nu-le-pa kinepna tan atun theihna di ua khosak - innteen-louteen leh sum-le-pai - a haksatnate in a gakchipte bangtan hiam a suahtakna ipiak theih diing uh ngimna leh lam-etna toh kalsuan ihi uhi.
Teach Zodawn ikichi ua, zodawn va pha a, lai va hilh diing, chih itup pipen ahi masa kei a (ihih zoh leh hihlouh di chihna chuh a om nai kei), himahleh, agal akipan a kam kia a awlmohthu gen saanga, sum-le-pai thohkhawm a, huaite amau adia manphataka zat ahih diing lunggulhna ahi zaw hi.
I theihchiat mah bang un, resource hoihtak nei, Zodawn School te phuahphatna dia infrastructure lam khawnga sanction pe thei, agency ihi kei uhi. Hiai te enkai dia ikoih deuh bang leng a om kha sek hi. Himahleh, Zodawn siamsin naupangte mahmah haksatna hih zangkhai sawm ihi uhi. Huaiziak mah in Naupang te sponsorship lam ah pan ila khawm uhi. Laisiam thei - class topper a pang gige te kia focus in i nei kei ua, huai saangin hihtheihna tan suah a innkuan khosakna/dan en a naupang chawm (sponsor) ihi uhi.
Huchi in, kum teng in naupang i sponsor te uh pung sak tou thei zel in ki om hi. Tuanvai a kipei theite saang mah inle, contribution (atawm-atam gen lou a) taima tak leh neih dandan a pe te' panlakna zahtaak huai in a ngaisaan huai mahmah hi.
I nasepna uh toh kisai, ahun bangzel in report hong ki koih tou zeel dia (i blog uh leh fb group uah), naktaka panla tou zel din leng iki chial sawnsawn uhi. Kintak in i nasep gah uh muh di om hehu ahi khol kei maithei, himahleh, pangkhawm a hihtheih lam chiat a i panlaknate uh, mihingte ittu diktak Pathian in hong thawnsak lou hial diing ahi, chih i gingta tinten hi.
Tu'n, Teach Zodawn min suanga i sepkhawmna uh kum 3 aphata! Phungvuhtu diing tunitan kitatlou in i om tou zel ua, kipahhuai mahmah hi. Panlakna chi tuamtuam a pang, Teach Zodawn phungvuhte tungah kipahthu naktak in igen uhi.
